2007年3月4日 星期日

跳樑小丑

馮檢基、李鑾輝都是特首選委,毓民識咗兩位老兄都好多年,基哥在回歸前參加「臨時垃圾會」,搞到九八件立法會選舉民協全軍盡墨。另外一位李鑾輝,佢喺港台做咗幾廿年啦,毓民嘅中學同學,識咗幾十年。兩個依家揸支雞毛當令箭,因為佢哋做咗三月一日的特首選舉答問大會召集人,一齊同毓民玩針對。今年二月一日,曾蔭權宣布參選的記者會,毓民同勞醫生以「myradio.com.hk」的身份入去,結果就被認為係「踩場」,畀人踢咗出嚟,大概佢哋怕毓民又照辦煮碗去「搞事」,所以就訂立入場要「驗明正身」的規矩,要在影視處有登記的傳媒機構先叫做「媒體」,網上電台就唔算。我覺得真係好離譜,有乜理由網上電台唔算係媒體?咁都未算喎,馮檢基講咗一句說話,露出狐狸尾巴,「新聞記者入嚟係報道新聞,唔係製造新聞。」即係話,毓民係製造新聞,要曝光,所以唔歡迎毓民。  香港係資訊自由流通嘅社會,你馮檢基叫做民主派,好高姿態參加梁家傑陣營的競選活動,依家就做咗親建制嘅選委主辦呢個所謂有特首選舉答問大會嘅召集人,係咪好奇怪呢?泛民對於大會安排非常唔滿意,就係無公眾參與,透過傳真同電郵,畀個主持人揀過啲題目出嚟,代答,代問!你馮檢基搞呢場答問大會又係咩意思呢?搞到一塌胡塗。呢啲所謂民主派,如果香港嘅民主要靠佢哋嚟爭取,做乞丐都有份。  仲有嗰個梁家傑又係荒謬,喂!你當初話參加呢個小圈子選舉,第一就係希望有場辯論,但係呢個答問大會無辯論,咁你都去參加?仲有,呢個小圈子選舉你係無權投票自取其辱,六百四十一個選委提名曾蔭權,唔通投票會有一半選委投白票,或者僧改投你梁家傑?發夢無咁早。你梁家傑應該承認失敗,向曾蔭權道賀,然後公開向香港人民道歉,悔不當初參加呢個小圈子選舉。  李鑾輝呢?依家係新鴻基地產集團公關大員,佢老闆係商界功能組別代表,搵佢去做選委,點知佢屁股決定腦袋,佢話:「如果黃毓民搵份報館工做,做記者,有傳媒機構請佢,咁佢要入嚟,我都無得拒絕。」咁講好明顯係侮辱人。我毓民活到五十幾歲,做新聞、大眾傳播工作三十六年,喺大專教新聞系教咗十三年,做過好多份報紙嘅記者、編輯、採訪主任、總主筆、社長、自由都辦過報,電台、電視,做時事節目做到全香港無人唔識我,網上電台網上報紙,我係極少數做得比較成功的人之一,公司仲上埋市,只因為科網股爆破而倒閉,我邊忽唔係傳媒人,你依家叫我搵份報館工,然後先至畀我入去,呢個唔係侮辱係乜。  香港這個政治社會,不但不正常,更是政治惡棍一大堆,連馮檢基、李鑾輝呢啲跳樑小丑都可以也文也武,所謂虎落平陽被犬欺,我無支咪,你啲人恰得就恰,人在做天在看,我一日無斷氣都未知邊個輸。三月一日我一定去答問大會,而且一定用網上電台的身份,你唔畀我入,咪大家睇吓點。

沒有留言: