2008年4月24日 星期四

民協玩SM罅隙求存

舊年區議會選舉失利後,民協放棄奉行十幾年「又傾又砌」方針,改行「理性進取」路線。可能覺得呢個新口號冇乜特色,新主席老虎仔廖成利就大玩爛Gag博出位,一時形容民協係「民主派面鴿派」,擺明當白鴿黨冇到;一時又話佢有多位猛男,會搞好民協呢個SM Party。SM咁激?唔知情仲以為佢轉搞色情事業。
老虎仔、前主席KK馮檢基同上個月加盟運輸業人士蔣志偉,尋日傳媒飯局講解佢選舉大計,老虎仔同KK將分別出選九龍東、西,如無意外蔣志偉會出選新界西,望借民協個名同佢班運輸物流界粉絲,呢場新西大混戰中博大霧出線。估計最終贏到幾多席?老虎仔舉起一隻手指,話可能三個一齊贏,可能一齊輸,可能只贏到一席,亦可能只輸一席。即係乜都冇講過!
挺煲呔曾兩邊不討好最感興趣始終係佢最新定位,皆因前日KK立法會慷慨陳詞,支持煲呔曾豪花六千萬元增設大批副局長同政治助理職位,之後不但遭泛民主派質疑佢轉,連建制派亦揶揄佢表態交心,兩邊都唔討好。
事實上連老虎仔都記唔清民協新口號,錯晒認真失禮。為吸引傳媒報道,佢仲大玩《三國》爛Gag,強調呢次轉型唔係「石(劉千石)化」,而係「廖(廖成利)化」,名副其實係「廖化作先鋒」。佢又話邀得蔣志偉呢位「猛男」入黨,都係師承諸葛亮「借東風」同「借箭」伎倆喎。
講到興起,佢仲話民協係一個中小型政黨,英文就係Small and Medium Party,簡稱就係「SM Party」!好在現場幾位女記者都冇點為意,否則分分鐘會投訴老虎仔性騷擾。搞咁多爛Gag為乜?講講去,都係顯示佢要罅隙中搵位生存